Tuesday, September 13, 2011

Mola awape Subra wafiwa wote katika kipindi hiki kigumu cha Msiba!


Na Ramadhan Himid, Zanzibar
Mengi yamesemwa na yanaendelea kusemwa juu ya msiba mkubwa uliolikumba taifa huko Zanzibar katika usiku wa kuamkia tarehe 10 Septemba mwaka huu wakati Meli ya MV Spice Islander iliyokuwa ikitokea Zanzibar kuelekea Wete Pemba kuzama katika mkondo wa Nungwi, Mkoa wa Kaskazini Unguja.
Wale wenye imani inayofanana na mimi huwa kila tunapopatwa na jambo zito kama hili hulielekeza moja kwa moja kwa Mola wetu kwa kusema “Inalillah Waina iraih rajiuun”, yaani, “Sisi sote ni Waja wa Mungu na kwake yeye tu ndio Marejeo”.
Bila shaka lililoandikwa na Mungu halipanguki, na tukiamini hilo tutakubaliana pia kwamba sisi tuliwapenda sana jamaa zetu ila Mungu amewapenda zaidi, na yeye tu pekee ndiye mwenye maamuzi sahihi ya kufanya apendavyo.
Sina lengo la kukumbusha kilio matangani, lakini msiba huu ni mkubwa na umemgusa kila mmoja wetu kwa namna moja ama nyengine na ndio maana tunasema ni msiba wa kitaifa ambapo nami kupitia kalamu yangu hii sinabudi kutoa rambi rambi yangu kwa ndugu zetu tuliowapoteza
Kwa hakika Zanzibar nzima ilijinamia na haikuwa rahisi mtu kujizuia hisia zake na watu walikuwa na kila sababu ya kuangua vilio vyao na hata kushindwa kula.Tunasema ni msiba mkubwa haujawahi kutokea , na tumuombe Mungu atuepushe kwa hili na jengine.Amin.
Mungu atupe subra katika kipindi hiki kigumu kwa kuwapoteza jamaa zetu 197 ambao walifariki dunia na 619 waliookolewa. Ni kipindi kigumu lakini kwa kuwa mwanadamu amepewa sahau, inshaallah Mungu atatupa lenye kheir na sisi zaidi ya hao tuliowapoteza.
Ajali hii mbali na kutukumbusha ajali ya Mv Bukoba iliyotokea Tanzania Bara, bali pia inatukumbusha kuwa ni takribani miaka miwili hivi ambapo MV Fatih ilizama chini ya Bandari Zanzibar May 27, 2009 ambapo tuliwapoteza watu saba.
Mbaya zaidi kinacholeta taharuki kwa ajali hii ya MV Spice Islander ni kwamba idadi halisi haijulikani hadi sasa kwani inasemekana meli hiyo ilisheheni pomoni kuliko uwezo wake wa kawaida huku ikiwa na tani nyingi za mizigo.
Idadi ya waliokata tiketi inasemekana ni 610 lakini hofu ni kwamba majeruhi waliopatikana ni 619 na waliopatikana wamefariki ni 197, ni sawa na 816. Lakini ukifuatilia kwa karibu watu wengi bado wanaendelea kuwatafuta jamaa zao ambao walikuwemo katika meli hiyo, tena wengine wakiwa na watu watano ama zaidi, hebu na tujiulize meli hiyo ilikuwa na abiria wangapi?
Hili ni swali zito ambalo kila mmoja wetu anaweza kuwa na jawabu yake mwenyewe, lakini ni vyema wenye vyombo vya usafiri wa majini pamoja na Mamlaka husika kila mmoja akatekeleza wajibu wake kwa kuweka mbele maslahi ya umma kuliko maslahi yao binafsi. Umefika wakati kuhakikisha kwamba kunakuwepo kwa usimamizi wa karibu wa kuhakikisha kila meli inakuwa na idadi maalum ya abiria na inapakia kadri ya uwezo wake, tuache tabia ya kujali kitu kuliko utu.
Ni vyema pia zikawapo kumbukumbu maalum za wasafiri jambo hili litasaidia sana kujua idadi halisi kuliko kuzusha taharuki mitaani kama ilivyo hivi sasa ambapo kila mmoja anasema vyake.Jambo hili si gumu iwapo kila mmoja atatekeleza wajibu wake ipasavyo kwa kujali uzalendo na uchungu wa nchi yake. Aidha umefika wakati kwa Mamlaka husika kutoa taaluma ya wajibu wa msafiri na haki zake akiwa safarini pamoja na wajibu wa mwenye chombo na wafanyakazi wake aliowaajiri wakiwa wao ndio hasa dhamana wa chombo hivyo wakati wa safari.
Ninalisema hili kwasababu maalum, kwanza inasemekana kuwa chombo hicho kilijaza kupita kiasi na kabla ya kuondoka bandarini hapo kilikuwa tayari kimeshalemewa upande mmoja na hadi baadhi ya waliokata tiketi kuahirisha kusafiri kwa siku hiyo, lakini kwanini wafanyakazi wa chombo hicho nao wakashindwa kutimiza wajibu wao kwa kupunguza ama mizigo au abiria badala tu ya kuruhusu kuondoka bandarini ilhali wanajuwa kuwa lolote linaweza kutokea.
Kwa upande wa abiria, naamini walijua kuwa chombo kilijaza kadri ya uwezo wao lakini nao kama binadamu huwa hawapewi haki zao kama wasafiri na hii pia inatokea hata kwa usafiri wa nchi kavu abiri wanapodai kuwa chombo kinaenda mbio hutishiwa kuteremshwa njiani ama ndio dereva akakasirika na kuondeza mwendo zaidi.Ndio maana nikasema taaluma hii izidi kutolewa kuelezea haki na wajibu wa msafiri na msafirishaji wakati wa safari.
Tukishindwa kuyafanya haya kwa kuamini tu kuwa mwenye sukani ndiyo mwenye uamuzi wa kufanya atakavyo, tunaweza tukaharibikiwa mno, lakini kama tutakuwa na utaratibu maalum wa kuwajibishana kati ya mwenye chombo kuhakikisha kuwa chombo chake kinakuwa kizima, dereva (kapteni, rubani, baharia) anajali maisha ya aliowapakia na abiria kujua haki zake kutonyamazia kasoro ambazo zinaweza kupoteza uhai wake ….hapo tutakuwa salama!
Waswahili wanasema “ukupigao ndio ukufunzao”,ni wakati mwafaka hivi sasa kuwa na vyombo vya kisasa vya usafiri pamoja na kuokolea pindipo kutatokea maafa makubwa kama haya,Mungu atuepushie.
Serikali yetu nayo lazima iweke kipaumbele cha pekee kwa kuhakikisha kwamba tunakuwa na vyombo vya kisasa vya usafiri wa majini, kwani wengi wetu tunategemea usafiri wa bahari ambao ndio nafuu kuliko usafiri wa anga kwa safari za kwenda Pemba na Dare-es-Salaam , hasa ikizingatiwa kuwa hakuna usafiri mwengine mbadala kutokana na visiwa vyetu kuzungukwa na bahari.
Kwa kweli taifa limepoteza rasilimali muhimu sana kwa uzembe tu wa watu fulani ,inasikitisha na inauma sana kuona watu wengi wamefariki katika ajali hiyo , hasa wakiwemo wanawake na watoto.
Tuiachie Tume ya Usalama wa Taifa fanye kazi yake, lakini haki lazima itendeke na kusiwepo upendeleo kwa kuwafumbia macho baadhi ya watu ambao tukiendelea kuwafumbia macho kuna siku watatufumbua macho huku tumekufa.

Taarifa kwa vyombo vya habari kuhusu maiti zilizookotwa Mombasa

PRESS RELEASE
Maiti tano zinazofikiriwa kuwemo kwenye meli ya m.v spice zimeokotwa katika ufukwe wa mombasa nchini Kenya. Mwenyekiti wa kamati ya taifa ya maafa zanzibar Makamu wa pili wa rais wa Zanzibar Balozi seif ali iddi ameeleza hayo afisini kwake vuga wakati akiendelea kupokea salamu za pole kutoka kwa wawakilishi wa taasisi na jumuiya mbali mbali waliofika fasini hapo kuwafariji.
Balozi seif amesema taarifa hizo zimekuja kufuatia mawasiliano kati ya serikali na Afisi ya ubalozi mdogo wa Tanzania uliopo mombasa nchini Kenya. Amesema maiti hizo tano zinafanya idadi ya maiti waliopatikana hadi sasa kufikia 202.
Makamu wa pili wa rais amezishukuru taasisi zote zilizotoa mchango wao ambao unaashiriia kukugwa na msiba huo.
Taasisi zilizowasilisha ubani wao ni pamoja na chama cha mapinduzi CCM makao makuu,wabunge wanawake wa bunge la afrika mashariki,jumuiya ya khoja shia isnashir ya afrika, uongozi wa baraza la wawakilishi Zanzibar,arusha wazee club, benki ya NMB kwa kusirikiana na baraza la manispaa Zanzibar pamoja na benki ya vitega uchumi Tanzania { TIB } pamoja na Kampuni ya IPP Media ya Dar es Salaam.
Kwa upande wake Waziri wa Nchi Ofisi ya Makamu wa Pili wa Rais wa Zanzibar Mh. Mohd Aboud Mohd amepokea michango kutoka taasisi tofauti zilizohamasika kuchangia familia zilizopatwa na maafa hayo.Waliochangia fimilia hizo ni pamoja na jumuiya ya watu wanaoishi na virusi vya ukimwi Zanzibar{ zapha + }, Taasisi ya uwekezaji vitega uchumi Zanzibar { ZIPA }, Jumuiya ya Wanasheria Zanzibar
{ Zanzibar law Society }, Taasisi ya Huduma za Viwanja vya Ndege Tanzania { ceo }.
Akitoa shukrani zake Waziri Aboud amesema kwamba nia ya Serikali ni kuona kuendelea kuwatafuta watu wote ambao bado hawajapatikana kufuatia ajali hiyo.
Wakitoa salamu zao za pole wawakilishi wa Taasisi hizo wameipongeza Serikali kwa jitihada zake za kuleta Heshima ya nchi kutokana na kukabiliana vyema na maafa hayo kwa Ushirikiano wao wa karibu na Wananchi na Taasisi za Uokozi. Jumla ya shilingi la Kitanzania milioni148,200,000/- zimepokelewa kutoka kwa Taasisi na Jumuiya tofauti za ndani na nje ya nchi.
Othman Khamis Ame
Ofisi ya Makamu wa Pili wa Rais wa Zanzibar

Monday, September 12, 2011

September 11,2011

Statement attributable to the Spokesperson for the UN Secretary-General on the Zanzibar, Tanzania ferry disaster.

The Secretary-General is profoundly saddened by the tragic loss of life after a ferry capsized off the coast of Zanzibar, United Republic of Tanzania, on 10 September.

He expresses his condolences to the Government and people of the United Republic of Tanzania and Zanzibar and the families of the victims. He also wishes a speedy recovery to the people who survived the accident.

The United Nations stands together with the people of Tanzania at this tragic moment.

Sunday, September 11, 2011

Method Kilaini ndani ya KCP

MKUTANO MKUU WA KAGERA PRESS CLUB (KPC) Septemba 10, 20
PONGEZI
Kwanza ya yote napenda kuwashukuru kwa heshima ya kunialika niwe mgeni rasmi katika mkutano wenu huu mkuu. Waandishi wa habari ni sehemu muhimu katika jamii na mhimili wa nne wa jamii. Hivyo napenda kuwapongeza kwamba mliamua kuunda chombo kinachowaunganisha katika kutimiza majukumu yenu makubwa ya kuunda jumuiya na jamii ya watu kwa kuwapa habari, kuwaelimisha, kuwahamasisha na kuwapa changamoto. Umoja ni nguvu na utengano ni udhaifu. Kwa watu wa habari ni rahisi kujikuta wanararuana na kuharibiana kazi badala ya kuungana katika kutoa mema kwa watu bila kukwaza ukweli.
UMUHIMU WA WAADISHI WA HABA
1. Waandishi wa habari na vyombo vyao wana uwezo wa kujenga au kuharibu kwa sababu ndio wnaotoa habari za matukio na watu wanawaamini sana. Tajiri mmoja mmiliki wa gazeti alishindwa kumwaminisha mfanyakazi wake juu ya habari Fulani lakini alipoiweka katika gazeti lake mfanyakazi huyo alikuwa wa kwanza kmumwambia kumbe ni kweli kwa sababu ameviona gazetini. Kuposha habari huleta madhara makubwa kwa jamii.
2. Waandishi wa habari wana uwezo wa kuchokoza hata viongozi wa serikali na kuwafanya watimize wajibu wao. Mnakumbuka sakata la magogo ya miti kutoka Rufiji yaliyosafirishwa kwa wingi hata misitu ikaanza kutoweka, vilikuwa vyombo vya habari vilivyopuliza filimbi na hatua zikachululiwa. Huu ni mfano mmoja kati ya matukio mengi.
3. Vyombo vya habari vinatoa mwanya kwa watu kutoa maoni yao na kufanya sauti ya watu hata wale wanyonge isikike. Sauti ya wasio na sauti.
MAADILI YA WAANDISHI WA HABARI
Inafurahisha kuona kwamba KPC ni wanachama hai na wenye uhusiano mzuri na Baraza la Habari Tanzania (MCT). Baraza hili lina kazi siyo tu ya kutetea uhuru wa habari kufuatana na ibara ya 18 ta katiba ya Tanzania, lakini vile vile kuhakikisha wanahabari wanafuata maadili ya kazi yao. Ili kukuza heshima ya fani yenu hapa Kagera inabidi muwe wanachama hai kwa matendo katika baraza hilo. Uandishi wa habari bila maadili ni sumu kwa jamii. Mifano mikubwa ni jinsi vyombo vya habari vilivyotumiwa Rwanda na Kenya wakati wa machafuko na mauaji.
Jukumu la mwanahabari ni kutoa ukweli hata ule mchungu kwa ajili ya kujenga na kutibu jamii, kuleta uelewano na siyo chuki, mshikamano na siyo utengano, kujenga na siyo kubomoa. Hiyo kazi mtaifanya kama mtasaidiana kufuatana na maadili yanayotolewa na baraza hilo ambalo ni la hiari, huru na lisilo la kiserikali lililoanzishwa mwaka 1997, likiwa na lengo la kujirekebisha lenyewe ili lisitoe mwanya na sababu kwa wengine ikiwemo serikali kuwabana kwa kisingizio cha utovu wa nidhamu. Muwe na uwezo wa kukosoana na kuambizana ukweli.
UHITAJI WA WANAHABARI MKOANI KAGERA
Mkoa wa Kagera una uhitaji wa kupata wanahabari wengi na makini. Kuna watu wengi nje ya mkoa hasa wanakagera amabao wana kui kikubwa kupata habari za Kagera. Hivyo lengo lenu la kuitangaza ni zuri na lenye tija kwa sisi sote. KPC ina kazi kubwa na nzuri ya kuwasaidia na kuwahamasisha wanahabari wa mkoa wa Kagera kutimiza majukumu yao ya:
a. Kutangaza mambo mengi mazuri yanayofanywa Kagera kwa wanakagera na ulimwengu mzima. Ni ninyi mtaweka Kagera kwenye ramani ili mtu asiulize Kagera ni nini? Mnategemewa kuienzi na kuiuza Kagera, utajiri wa kitalii, mazao yake mazuri, utamaduni wake na mafanikio yake. Ninyi muwe wa kwanza kujifunza na kujua Kagera na utajili wake. Tembeleeni sehemu mbali mbali na kutaneni na watu mbali mbali.
b. Kurahisisha kuomba misaada kwa ajili ya Kagera wakati wa shida na maafa kwa kuyatangaza. Mfano ni kimbunga kilichopiga Muleba. Ilituwia rahisi kuomba misaada nje kwa sababu taarifa ilitoka kwenye vyombo vya habari na hatukupashwa kutoa maelezo mengi. Hivyo juzi nilikwenda huko kugawa mabati na mashuka kutoka Caritas Tanzania kwa niaba ya kanisa Katoliki, ninawashukuru sana.
c. Kusisimua viongozi mara nyingine kutoka usingizini kwa kuyaainisha matatizo ambayo hawajayafanyia kazi. Kazi yenu siyo kila mara kufuatana nyuma ya viongozi na kuripoti majigambo yao na kuwafurahisha, nendeni na kule amabako wamesahau na kuonyesha uozo uliopo. Msiogope, mwandishi wa habari anayeogopa na kuwa kibaraka mradi kula hatakuwa hata siku moja mwandishi makini mwenye kuheshimiwa. Fichueni uozo, uzembe na hata ufisadi kama upo hapa Kagera na hapo vitafanyiwa kazi.
d. KPC iwe shule kwa ajili ya waandishi wadogo ambao bado hawajapata elimu kubwa ya uandishi ili waweze kuleta habari kutoka vijijini. Nashukuru na hongera nma uhusiano mzuri na (MCT) na Mfuko wa Habari Tanzania (TMF) na mmefanya kwa mafaniko mradi mkubwa nao, na wao wako tayari kuendelea nanyi. Hivyo hakikisha wale mtakaowachagua wawe na uwezao wa kuendeleza juhudi hizo.
e. Chama kitoe msaada kwa magazeti na vyombo vya habari vya hapa mkoani Kagera na kuanzisha vingine. Najua wengi kula yao ni magazeti na vyombo vya habari vya jijini Dar es Salaam na Mwanza na sina ugomvi nal kwa sababu na linatusaidia kupeleka habari na maoni yetu taifani. Lakini ujuzi wenu usaidie vile vile vyombo vya matumizi ya ndani ili Bukoba/Kagera iwe kituo cha habari (hub).
f. Vyombo vyetu vya habari viwe uwanja wa wanachi kuleta maoni, mawazo, furaha, manunguniko na mafaniko yao kwa umma. Nafurahi sana kusikiliza redio zetu.
g. Changamoto moja ni kwamba waandishi wa habari wengi wako hapa Bukoba mjini na wilaya nyingine hazina hata mmoja. Nilikuwa Muleba Mkuu wa wilaya akaniambia kule hakuna mwandishi hata mmoja, nikashangaa. Najua ninyi hamtahamia Muleba lakini mnaweza kuwahamasisha wana Muleba walu wachache wakajihusisha na uandishi wa habari hata kama siyo wataalamu wakubwa nanyi mkahariri habari hizo. Vile vile haitoshu ninyi kuandika habari za Dar es salaam tu na labda kidogo za Bukoba mjini hasa wanapotembelea viongozi wa juu bali fanya utafiti juu ya sehemu zote za Kagera.
WANAHABARI KAMA FAMILIA MOJA
Inajulikana kwamba magazeti na vyombo vya habari vina wenyewe na kila mwenye chombo ana lengo lake. Mwandishi au mtangazaji lazima afuate sera ya mwenye chombo na vingine vinapingana katika mielekeo yao. Kwetu hilo siyo baya kwa sababu linatupa sisi wadau mitazamo tofauti ili nasi tuweze pupambanua kati ya pumba na mchele. Licha ya hilo ninyi wanahabari mnapashwa kuwa marafiki na ndugu bila uhasama ingawa mara nyingine mnapingana katika maandishi yenu mradi usiseme uongo bali iwe tu ni mitazamo na mkazo tofauti katika ukweli huo huo.
Mkiwa familia moja hapo mipango yenu ya maendeleo itafanikiwa. Leo uko gazeti/radio/TV ya mlengo wa kulia, kesho utakuwa na lile la mlengo wa kushoto bali wewe ubaki mwanahabari. Pawepo uwezekano wa kuketi na kuchambua pamoja habari ndani na nje ya vyombo vya habari ili kupanua ugo wenu. Kuwa na miradi ya pamoja kama vyombo vya habari, mini press na hata SACCOS ya kujikimu. Mwanahabari mwenye njaa husaliti fani yake kwa sababu hulipwa kupindisha habari ambacho ni mwiko na aibu kwa manahabari na madhara yake ni makubwa kwake binafsi na kwa jamii.
Ni vizuri sana kwamba mnaweka mazingira kwa wale wadogo kufanya kazi kama kuwapa kamera, scanner, computer, printer vya kuandikia stori zao na mengine. Kupitia hapo watajifunza na kukua kuwa wanahabari wanaojitegemea.
Uanachama siyo tu kupata faida lakini vile vile una majukumu yake. Mafanikio hutokana na jasho na juhudi. Ukiwa mwanachama kwa mfano itabidi ulipe ada yako mapema ili chama kimudu kazi zake, ushiriki katika mikutano inapoitwa, uchangie kwa namna mbali mbali kwa hali na mali. Asiyetupa haokoti, tupa kwanza na hapo utaokota mengi. Uwajibike, mkipata mradi wa kutekeleza, usaide kuutekeleza vizuri na kutoa ripoti zote zinazohitajika kwa wakati ili waweze kuwaamini na kuwapa miradi mingine. Usiganganie marupurupu ya miradi bila kuitolea jasho lako. Asiyefanya kazi asile.
UCHAGUZI
Mimi simpigii ye yote kampeni na wala sijui nani anagombea, ila nawaombea uchaguzi wenye tija na uwaweke viongozi waostahili na wenye sifa katika safu za kutoa maamuzi. Wawe viongozi wabunifu wataoimarisha siyo tu vilivyopo bali watabuni na njia nyingine za kukiendeleza chama na fani ya uandishi Kagera kwa ujumla. Wawe viogozi wawajibikaji na waaminifu wataoaminiwa siyo tu nanyi lakini hasa wafadhili wa nje ili misaada inayotolewa ifikie lengo lake kwa wakati na kwa mafanikio. Viongozi wa heshima na ustaarabu ambao wataheshimiwa na wote hata viongozi wa serikali na taasisi nyingine ili wawe na uwezo wa kuwasilana nao bila shida. Viongozi wenye kujali kiasi kwamba wataweza kuwasiaidia vijana wanaotaka kuingia fani hii lakini hawajui waanzie wapi au wameingia lakini bado wanyonge bila kuwadhalilisha, kuwakandamiza au kuwaomba hongo.
Ndugu mwenyekiti napenda kumalizia kwa kuwatakia kila la heri na fanaka katika mkutano wenu mkuu ambao utatoa vingongozi bora wa kusimamia fani hii muhimu katika kipindi kijach cha miaka mitatu hapa Kagera. Sisi tuko pamoja nanyi.
Mwenyezi Mungu awabariki
+Method Kilaini
Askofu Msaidizi
Jimbo Katoliki la Bukoba

Sunday, September 4, 2011

Taarifa kwa vyombo vya habari

PRESS RELEASE
Ujenzi wa Afisi za Wabunge ndani ya Majimbo ni uamuzi sahihi wa Bunge La Jamuhuri ya Muungano wa Tanzania katika kuhakikisha huduma za Wananchi zinapatikana kwa haraka muda wote. Makamu wa Pili wa Rais wa Zanzibar Balozi Seif Ali Iddi ambae pia ni Mbunge wa Jimbo la Kitope amesema hayo katika hafla fupi ya kukabidhiwa Afisi ya Jimbo hilo baada ya kukamilika Ujenzi wake.
Hati za Makabidhiano ya Afisi hiyo ya Mbunge wa Kitope imetiwa saini kati ya mbunge huyo Balozi Seif na Mkuu wa Wilaya ya Kaskazini B Nd. Vuai Ali Vuai ambapo ujenzi wa Afisi za Wabunge unasimamia na Afisi za Wakuu wa Wilaya. Akikabidhi hati hiyo Mkuu wa Wilaya ya Kakaskazini B Nd. Vuai Ali Vuai amesema ujenzi huo unafuatia azimio la bunge la Jamuhuri ya muungano wa Tanzania wa kujenga Afisi za Wabunge Majimboni.
Akipokea Afisi hiyo mbunge wa jimbo la Kitope Balozi Seif Ali Iddi amewahakikishia wananchi hao kwamba yeye na mwakilishi wa Jimbo hilo Mh. Makame Mshimba wataendelea kushirikiana na Wananchi hao ili Maendeleo ya haraka ndani ya Jimbo hilo yafikiwe. Wakati huo huo Balozi Seif Ali Iddi ameutembelea ushirika wa mwendo wa jongoo wa Kazole ambao unajishughulisha na ukulima wa mboga mboga.
Akiunga mkono juhudi za wanaushirika hao Balozi Seif Amekabidhi ndondo kwa kuendeleza ujenzi wa Afisi ya Tawi la CCM la Kijiji hicho pamoja na mpira wa Maji na vifaa vyake na kuahidi kutoa makalbi ya kisima ili kuwaondoshea shida ya upatikanaji wa maji katika mradi wao wa kilimo.
Balozi Seif pia amekabidhi msaada wa Matofali, Saruji, mchanga na fedha za fundi kwa ajili ya kuendeleza ujenzi wa Tawi la CCM La Kichungwani na kushauri ni vyema Tawi hilo likaanza kutoa huduma mwaka ujao. Vifaa na msaada huo kwa Kikundi cha Ushirika cha Uwendo wa Jongoo na Afisi za CCM vimegharimu Shilingi Milioni Moja Nukta Moja.
Othman Khamis Ame
Ofisi ya Makamu wa Pili wa Rais wa Zanzibar

Thursday, September 1, 2011

Edd Mubarak




Je unamfahamu Meneja wa Mtegani?

Bw.Saumu Ali ndie Meneja mkuu wa Megani radio Fm, wakati huu ni mwandishiwa wa habari wa mkoa wa kusini Unguja
Meneja Saumu akibadilishana mawazo na mjumbe wake

Kazi ipo

Bi Rose mwenye baibui, kutoka UN Women wakati alipotembelea Mtegani radio hivi karibuni



Na hivi ndivyo radio yetu inavyofanya kazi na ndio maana tunataka msaada wake wa hali na mali na hasa katika suala zima la vifaa

Radio itumiayo juwa (solar power)

Radio ambayo inaonekama kama vile imetupwa lakini ukweli haikutupwa bali imewekwa juani kwa ajili ya kupata chaji ya kuweza kufanya kazi


Mtegani radio family

Baba na watoto wake ambao ndio wanaofanya timu nzima ya matangazo ya radio Mtegani Fm 91.9 Mkunduchi-ZanzibarHawa ni miongoni mwa kamati ya uongozi ya radio Mtegani pamoja na watangazaji, fundi mitambo, DJ pamoja na viongozi kutoka UN Women Dar-es-salaamHii ndio timu kamili ya matangazo ya mtegani fm Zanzibar

Thursday, August 25, 2011

TAARIFA KWA VYOMBO VYA HABARI

UCHUMI WA KIBEPARI CHANZO CHA MGOGORO WA MAFUTA
Kutangazwa punguzo la bei mpya za nishati ya mafuta tarehe 3/08/2011 na Mamlaka ya Udhibiti wa Huduma ya Maji na Nishati (EWURA), ilipelekea makampuni ya mafuta kufanya mgomo baridi wa kutouza mafuta kwa siku kadhaa. Jambo lililowatia dhiki na mashaka raia na kudhoofisha maisha ya kijamii na kiuchumi, na hatimae EWURA kusitisha leseni ya kampuni ya BP kuuza mafuta kwa jumla kwa miezi mitatu, kampuni ambayo serikali inamiliki nusu ya hisa, na pia EWURA kuzionya kampuni nyengine za Camel na Engen.
Kwa kadhia hii, Hizb ut-Tahrir Afrika ya Mashariki ina haya ya kusema: Chanzo cha mgogoro huu ni upotofu wa nidhamu ya kiuchumi ya kibepari ambayo imechanganyikiwa ambako hudhihirika katika mambo matatu: Kwanza, kwa ajili ya maslahi haitofautishi baina ya ‘mali za binafsi’ na ‘mali ambazo ni za umma’ kimaumbile. Pili, utozaji wa makodi makubwa katika biashara, na mwisho unafiki wa dhana ya ‘soko huria’.
Nidhamu bora na tukufu ya kiuchumi ya kiislamu ambayo Hizb ut-Tahrir Afrika ya Mashariki inaamini kuwa ndio suluhisho pekee, imeweka mpaka wa wazi katika mafungu ya mali, kwa kuanisha ‘mali binafsi’ zinazoruhusiwa mtu yoyote kumiliki, ‘mali za serikali’ zinazofanana na mali binafsi isipokuwa tu humilikiwa na serikali kwa sababu ya kuhusika na haki ya jamii na ‘mali za umma’ ambazo huwa marufuku kumilikiwa na mtu binafsi kwa hali yoyote ile. Mali za umma kimaumbile ni za watu wote, kama vile mali zote za asili- migodi mikubwa ya maadini, fukwe, misitu, barabara na kila ambacho maumbile yake ni cha matumizi ya umma kwa ujumla wake. Mali hizi na mfano wa hizi huwa kamwe hazimilikiwi na mtu binafsi, taasisi au kikundi cha watu, kwa kuwa raia wataingizwa katika dhiki na mashaka kama haya yaliyojiri karibuni na yatakayoendelea kujiri chini ya mfumo huu. Pia hizi si mali za serikali kama ilivyo ndani ya mfumo potofu wa Ukomunisti, bali kazi ya serikali ni kuzisimamia tu na kuwafikishia umma kwa namna nyepesi ya haraka na muafaka. Mtume (SAW) alizuia kummilikisha Abyadh bin Hammal mgodi mkubwa wa chumvi, na pia anasema: “Watu ni washirika katika mambo matatu: maji, maeneo ya kulishia wanyama na moto.” Hapa ‘moto’ huhusisha kila aina ya nishati. Pia Uislamu ukaweka bayana kwamba kazi ya serikali ni kuwatumikia raia kama msimamizi na sio tu kutoza makodi, bali serikali nayo ijihusishe kuzalisha kwa kufanya biashara mbalimbali kama raia wengine. Na tatu, katika Uislamu hakuna unafiki wa kuchanganyikiwa kama ulivyo ubepari ambao asili yake huwapa mamlaka makubwa mabepari kuwanyonya wanyonge kwa dhana yao ya ‘soko huria’ na upande wa pili hujifanya ati una huruma kwa kupachika kiraka kinachogongana na mfumo wao kwa madai ya kiuwongo ya ati kuwasaidia wanyonge kwa kupanga baadhi ya bei za bidhaa muhimu! Ama Uislamu, ukiachilia mbali mali za umma na mali za serikali, mali zilizobakia zote ni haki ya raia wenyewe kupanga bei zao bila ya kuingiliwa, na hili pia huhusisha bei za huduma na mishahara kwa kuwa suala la kazi ni mkataba baina ya muajiri na muajiriwa peke yao. Na pale ambapo raia kapungukiwa katika kukidhi mahitaji yake ya msingi huwa ni jukumu la serikali (Khilafah) kumkidhia raia huyo mahitaji yake.
Hizb ut-Tahrir Afrika Mashariki inatangaza wazi kwamba kadhia hii ni dhihirisho nyongeza kwamba dunia leo inahitaji nidhamu mbadala ya kiuchumi kama inavyohitaji nidhamu mbadala ya kisiasa na kijamii ili kuokoa ubinaadamu, nidhamu ambayo ni ya kiislamu na sio nidhamu ya kibepari inayowatia watu dhiki na iliyosheheni viraka vinavyogongana na misingi ya mfumo wake.
Masoud Msellem
Naibu Mwakilishi kwa Vyombo vya Habari
Hizb ut-Tahrir Afrika Mashariki

TAARIFA KWA VYOMBO VYA HABARI

HIZB UT- TAHRIR AFRIKA MASHARIKI YAWASILISHA ‘SHUTUMA YA DHULMA DHIDI YA WAISLAMU’ KWA UBALOZI WA PAKISTAN
Tarehe 12/08/2011 Hizb ut-Tahrir Afrika Mashariki iliwasilisha rasmi shutma kwa ubalozi wa Pakistan jijini Dar-es-Salaam dhidi ya vitendo vya nchi hiyo vya dhulma, maonevu na unyakuzi wa kuwatia nguvuni kisiri wanaharakati wa Kiislamu wasio na hatia, kwa ‘kosa’ tu la kuulingania Uislamu kifikra bila ya kujihusisha na kitendo chochote cha nguvu.
Shutuma hizo ziliwasilishwa na Naibu Mwakilishi kwa Vyombo vya Habari wa Hizb ut-Tahrir Afrika Mashariki (Masoud Msellem) na Mjumbe wa Kamati ya Mawasiliano ya Hizb ut-Tahrir Afrika Mashariki (Sheikh Mussa Kileo), na kukabidhiwa Afisa Utawala na Mwambata wa ubalozi wa Pakistan nchini Tanzania bwana Masud Hassan Khan. Pamoja na shutma hizo Hizb ut-Tahrir Afrika Mashariki iliwasilisha pia waraka maalum uliotolewa na Hizb ut-Tahrir ndani ya Pakistan, unaotaja kinaga ubaga majina na mazingira ya unyakuzi wa Naibu msemaji wa Hizb ut-Tahrir Pakistan (Imran Yousafzai) na wanachama wengine waandamizi wa Hizb ut-Tahrir ndani ya Pakistan akiwemo Hayan Khan, Ousama Hanif na Dk. Abdul-Qayuum. Wote walinyakuliwa kisiri na wanaendelea kushikiliwa mafichoni pa siri kwa dhulma na serikali ya Pakistan bila ya hatia yoyote. Aidha Hizb ut-Tahrir Afrika ya Mashariki iliisisitiza (demand) serikali ya nchi hiyo kuwacha vitendo hivyo vya dhulma mara moja na kuwaachia huru Waislamu hao. Shutuma kama hizi pia ziliwasilishwa kwa ubalozi wa Pakistan jijini Nairobi kwa kupitia Mwakilishi wa Vyombo vya Habari wa Hizb ut-Tahrir Afrika ya Mashariki (Shabani Mwalimu)
Licha ya Hizb ut-Tahrir Afrika Mashariki kulaani kwa nguvu zote dhulma na uonevu huu na kuwataka Waislamu wote na kila mwenye chembe ya ubinaadamu kulaani unyama huu na kufanya upeo wa jitihada ili wahanga waachiwe huru. Pia tunatangaza kwa sauti ya juu kwamba dhulma na mateso hayawezi kamwe kuzuia Hizb kuendelea na kazi yake tukufu ya kulingania Uislamu kama mfumo bora mbadala hadi hatima ya kuasisi serikali yake, Khilafah Rashidah katika nchi kubwa za kiislamu kama ilivyobashiriwa na Allah Ta’ala na Mtume Wake (SAAW), ili kuukomboa ulimwengu mzima na uovu wa mfumo wa kibepari ukiwemo kukamata na kutesa watu kwa kutangaza haki. Siku hiyo, madhalimu watajuta lakini majuto yao hayatuwasaidia chochote!
Masoud Msellem
Naibu Mwakilishi kwa Vyombo vya Habari
Hizb ut-Tahrir Afrika Mashariki

Melbourne Unveils Draft Plan to Strengthen Business Ties with India, IST

The Australian city of Melbourne has announced a draft plan to strengthen business ties with India, with a focus on building economic prosperity, facilitating learning and supporting community, cultural and civic links between the two countries. The city of Melbourne already has a strong working relationship with India and this engagement framework will ensure it continues to grow. Currently, India is Australia's fifth largest trading partner and through this engagement, the city of Melbourne now plans to focus on three key goals -- building economic prosperity, facilitating learning and supporting community, cultural and civic links between the countries

Gems, Jewellery Exports Grow 5.4% in July, PTI
Gems and jewellery exports grew at a slow pace of 5.4 per cent to USD 3.3 billion in July year-on-year. In the previous month, the exports had jumped by 17 per cent. The exports stood at USD 3.1 billion in July last fiscal. The US accounts for about 25 per cent of the country's total gems and jewellery exports, Europe contributes 20 per cent. demand from new markets like Russia, Latin America and Africa is increasing

Monday, August 22, 2011

Afrika kusini yakana kumtorosha Gadhafi

Afrika Kusini imesema haijatuma ndege Libya kumsaidia kiongozi wa nchi hiyo anayepingwa Moammar Gadhafi ili kuondoka nchini.
Katika taarifa yake jumatatu, Serikali ya Afrika Kusini imesema inataka kukanusha tuhuma kwamba ndege za Afrika Kusini zitamsafirisha kanali Gadhafi na familia yake kwenda sehemu isiyojulikana.
Akizungumza na waandishi wa habari waziri wa mambo ya nje Maite Nkoana –Mashabane alisema bwana Gadhafi hajaomba hifadhi Afrika Kusini na anauhakika kwamba hawezi kufanya hivyo. Amsema haijulikani mahali alipo kiongozi wa Libya.
Rais wa Afrika Kusini Jacob Zuma aliongoza juhudi za umoja wa Afrika kutatua mzozo wa Libya baina ya Serikali ya bwana Gadhafi na waasi wanoungwa mkono na magharibi.
Huku ikionekana kuwa bwana Gadhafi ataanguka, Afrika Kusini imesema jumatatu kwamba inaunga mkono utaratibu wa Umoja wa Afrika unaotaka kuwepo serikali ya mpito ya Libya, kuandika rasimu ya katiba mpya, na kuitishwa kwa uchaguzi wa kwanza kabisa wa kidemokrasia nchini humo

Kura ya maoni Liberia

Wananchi wa Liberia wanatarajiwa kwenda kupiga kura siku Jumanne kwa ajili ya kutoa mapendekezo yao ya mabadiliko ya katiba ambayo yanaungwa mkono na chama tawala wakati huo huo chama cha upinzani nchini humu wanapingwa vikali mabadiliko hayo.

katika hali hiyo wabi mojawapo ya mabadiliko makubwa ambayo yanaonekana kuwa na nchini Liberia ni ile nafasi ya ugombea wa kiti cha urais ambapo kwa ujibu wa sheriza nchini hiyo, mtu anayetaka kugombea nafsi hiyo, anatakiwa awe ameishi nchini Liberia kutoka miaka 10 hadi 5.

Hali hiyo inaonekana inaweza kuathiri harakati zakisiasi nchini humo, kwani sheria inatakiwa iweseme ni wagombea gani wanaostahili kushiriki katika kinganganyri cha uchaguzi ujao. Wanasiasa wengi ambo waliondoka nchini humo wakati wa miaka 14 uhamishoni, hii ni kutokana na ghasia na machafuku za kiraia ambayo yalikuwa yakitokea nchini humo na kumalizika mwaka 2003.

Mabadiliko mengine yatachelewesha uchaguzi wa rais kutoka Oktoba mpaka Novemba.Waungaji mkono wanasema hatua hiyo itauondoa uchaguzi wakati wa msimu wa mvua ambapo usafiri unakuwa mgumu sana

Waasi waiteka Tripoli

Maelfu ya wakazi wa Tripoli wamekuwa wakisherehekea usiku kucha wakati wapiganaji walipoingia katika uwanja mashuhuri ambao wameubadilisha jina lake mara moja na kuitwa uwanja wa mashujaa ambako wa Libya waliokuwa na furaha walianza kuangusha na kuharibu mabango makubwa ya picha ya bwana Gadhafi na kuanza kuyakanyaga.
Hadi hivi karibuni serikali ya Libya imekuwa ikiutumia uwanja huo kuanda maandamano makubwa ya wananchi kuonesha uungaji mkono wa kiongozi wa Libya ambaye anaonekana kuwa ameshindwa hivi sasa.
Viongozi wa upinzani hata hivyo wamekiri alfajiri ya Jumatatu kwamba kungali kuna maeneo ambayo kuna upinzani ndani na nje ya Tripoli. Msemaji wa upinzani amesema wapiganaji wameshauzingira uwanja wa Bab Alazizya ambako wanaamini huwenda bwana Gadhafi amejificha lakini wanasita kuanza kushambulia.
Msemaji wa waasi anasema walipeleka kundi la wapiganaji kuingia katika mji mkuu kupitia bahari kutokea bandari ya Misrata. Aliongeza kusema kwamba kikosi maalum cha ulinzi wa Gadhafi kimejisalimisha na hivyo kuwawezesha wapiganaji kuchukua udhibiti wa sehemu kubwa ya mji

Sunday, August 21, 2011

TAARIFA KWA VYOMBO VYA HABARI

Serikali ya Mapinduzi ya Zanzibar haitosita kuwachukuliwa hatua za kisheria muda si mrefu viongozi wote waliohusika na masuala ya uvushaji wa magendo ya zao la karafuu nje ya Nchi.
Makamu wa Pili wa Rais wa Zanzibar Balozi Seif Ali Iddi ametoa kauli hiyo leo wakati akizungumza na Mabalozi wa CCM wa Mashina yaliyomo ndani ya Wadi ya Fujoni hapo Afisi ya CCM Tawi la Fujoni Wilaya ya Kaskazini B.
Balozi Seif amesema Viongozi waliohusika na Biashara hiyo ya Magendo ya Karafuu wanajuilikana na hatua ya kuwachukula sheria ina lengo la Kulinda Heshima ya Serikali. Amesema uamuzi wa Serikali wa kupandisha bei ni kuimarisha pamoja na kushajiisha uzalishaji wa zao hilo ambalo ni uchumi na muhimili wa Uchumi wa Taifa. “Hakuna sababu tena ya zao la Karafuu kuuzwa nje ya Nchi Kimagendo kwa vile bei ya bidhaa hiyo imepandishwa kuzingatia soko la Dunia ” . Alisema Balozi Seif Ali Iddi.
Amewaomba wakulima kuzidi kuimarisha kwa wingi uzalishaji wa mikarafuu mipya kwa lengo la kujiongezea kipato chao na kupunguza makali ya maisha. Akizungumzia suala la uchaguzi wa Viongozi wa CCM utakaofanyika Hapo mwakani Balozi Seif ambae pia ni mjumbe wa Kamati Kuu ya Halmashauri Kuu ya Taifa ya CCM amewatahadharisha Mabalozi hao kuwa makini katika kuepuka tabia ya kutanguliza ujomba katika kuchagua Viongozi.
Balozi Seif amesema ni vyema ikaeleweka kwamba wanayemchagua anafaa kuwaongoza akiwa na vigezo vyote vya uongozi. Amesisitiza kwamba Tabia ya kuendeleza urafiki katika suala la uongozi inapunguza sana nguvu za chama. Balozi Seif Ali Iddi ambaye ni Mbunge wa Jimbo la Kitope amemaliza ziara yake ya kukutana na Mbalozi wa Mashina ndani ya Jimbo hili
Othman khamis ame
Ofisi ya Makamu wa Pili wa Rais wa Zanzibar

Saturday, August 20, 2011

Press release

Wawekezaji wa Uingereza bado wana nafasi ya kuwekeza ndani ya Visiwa vya Zanzibar katika sekta ya viwanda kwa lengo la kusaidia suala la ajira hasa kwa vijana . Makamu wa Pili wa Rais wa Zanzibar Balozi Seif Ali Iddi ameeleza hayo wakati akihojiwa na Mwandishi wa Gazeti la World Report lenye makao yake Makuu Mjini London Nchini Uingereza Bibi Barbara Yankovic.
Balozi Seif Ali Iddi amesema uamuzi wa Wawekezaji wa nchi hiyo kuwekeza katika eneo hilo la Viwanda ambalo linachukuwa ajira kubwa zaidi bado liko finyu katika Uwekezaji. Amesema Changamoto kubwa inayoikabili Serikali ya Mapinduzi ya Zanzibar hivi sasa ni suala la ajira. Hivyo juhudi zinaendelea kuchukuliwa ili kuona eneo hilo linapata ufanisi katika kupunguza wimbi la vijana wasio na ajira. “ Uingereza na Zanzibar zina Historia ndefu sana katika masuala ya Kibiashara. Hivyo nafasi hiyo itasaidia kuimarisha zaidi ukaribu huo ” Alisema Balozi Seif Ali Iddi.
Balozi Seif amemueleza Mwandishi huyo kwamba miundo mbinu katika sekta nyengine kama vile Afya, Elimu, Utalii na Kilimo imefikia kiwango cha kuridhisha. Amesema kinachozingatiwa kwa sasa ni kuongeza nguvu zaidi katika sekta ya kilimo kwa vile inachukuwa asilimia 70% ya watu wote wa Zanzibar wanaoishi vijijini. Kampuni Binafsi inayomiliki Gazeti la World Report imekuwa ikichapisha makala na kutangaza mambo ya Kiuchumi, Wafanyabiashara na Uwekezaji hasa katika Sekta za Utalii . Hatua hiyo ina lengo la kuwashajiisha Wawekezaji tofauti wa Kimataifa kuwekeza katika Mataifa ambayo tayari yanasimamia vyema amani na kufuata utawala wa kidemokrasia.
Waandishi wa Gazeti hilo la World Report tayari wameshakutana na viongozi wa Kamisheni ya Utalii Zanzibar pamoja na Taasisi ya Uwekezaji Vitega Uchumi Zanzibar { ZIPA } kwa mazungumzo na kuangalia mazingira ya kuyatangaza maeneo hayo kwa wawekezaji nje ya nchi.
Gazeti hilo tayari limeshafanya utafiti wa Utawala Bora na kutangaza mambo ya Kiuchumi na Uwekezaji katika Mataifa ya Cameroun, Angola pamoja na Tanzania Bara.
Othman Khamis
Ofisi ya Makamu wa Pili wa Rais wa Zanzibar.

Thursday, August 18, 2011

kutatua migogoro kwa njia ya amani

Makamu wa Pili wa Rais wa Zanzibar Balozi Seif Ali Iddi ameishauri jamii kuendeleza utamaduni ya kutatua migogoro inayowazunguuka kwa njia na majadiliano ili kuepuka unyakuzi wa haki na maisha ya wananchi. Amesema majadiliano yanaondoa matumizi mabaya ya silala, uhasama na hatimaye kuepusha shari inayoweza kuzaa maafa.
Balozi Seif amesema hayo baada ya kuangalia eneo huru la kiuchumi lililoleta mgogoro baina ya vijiji vya wingi na maziwang'ombe micheweni Pemba na kupelekea Rais wa Zanzibar Dr. Ali Mohd Sheni Kuunda tume ya kusuluhisha mgogoro huo kwa njia ya majadiliano. Akizungumza na Viongozi wa Tume hiyo hapo Skuli ya Micheweni Balozi Seif amesema uwamuzi wa pamoja wa majadiliano kati ya pande hizo mbili umeleta faraja kwa Serikali na kupelekea wananchi wa eneo hilo kuishi kwa raha na amani.
Ameupongeza uwamuzi huo ambao hata Jumuiya ya Kimataifa zinautumia katika kutafuta suluhu za matatizo mbali mbali yanayotokea baina ya jamii au mataifa tofauti. ''Tungeendelea na vurugu za kukaribisha kutumika kwa marungu na mapanga tusingefikia hatua hii iliyoleta faraja kwetu sisi hasa viongozi wa ngazi za juu wa serikali'' Alisema Balozi Seif Ali Iddi.
Amewapongeza wananchi wa Wingwi na Maziwa ngo'mbe kufikia hatua hii ya amani na kuvishauri vijiji vyengine kuiga mfano huu. Amesema bado ipo migogoro kama hii kwa baadhi ya vijiji hapa nchini na cha kuzingatia ni kuona hatua ya mafakiano inafikiwa kwa kutumia tume za majadiliano baina ya pande zinazohusika na mgogoro.Mapema Mkuu Wilaya ya Micheweni nd. Juma Abdulla amesema eneo hilo la maeneo huru ya serikali ambalo lieasisiwa tokea mwaka 1992 linawapa fursa wananchi wa maeneo hayo kulitumia kwa vipando vidogo vidogo vya muda hadi hapo serikali kuu itapokuwa tayari kuwekeza. Nd. Juma amesema tamaa ya baadhi ya watu kuhodhi ardhi bila ya kuzingatia taratibu zilizopo ndio inayopelekea kuleta migogoro ya ardhi

Tangazo la mkutano mkuu wa MISA

TAASISI YA VYOMBO VYA HABARI KUSINI MWA AFRIKA–TAWI LA TANZANIA (MISA-TAN) INAPENDA KUWATANGAZIA WANACHAMA WAKE KUHUSU MKUTANO MKUU WA MWAKA NA UCHAGUZI WA VIONGOZI WA ASASI HIYO. MKUTANO HUO UTAFANYIKA KATIKA UKUMBI WA RUSSIAN CULTURAL CENTRE, UPANGA SEA VIEW, SIKU YA JUMAMOSI SEPTEMBA 10, 2011 KUANZIA SAA 3.00 ASUBUHI
AGENDA
1. Ufunguzi na Kuhakikisha “quorum”
2. Kuridhia Ajenda
3. Kuthibitisha kumbukumbu za mkutano uliopita
4. Yatokanayo
5. Kuwasilisha na Kupitisha Ripoti ya Mwaka 2010/2011
6. Kuwasilisha na Kupitisha Ripoti ya hesabu za Mwaka 2010/2011
7. Uchaguzi wa Viongozi
8. Mengineyo
9. Kufunga mkutano
Wanachama wote hai wanakaribishwa kuhudhuria.
Wale wote wanaotaka fomu za kugombea uongozi katika Baraza la Uongozi la Taifa (NGC) kwa mujibu wa katiba ya MISA-Tan wanatakiwa kuchukua na kurudisha fomu hizo kabla ya tarehe 2 Septemba 2011. Ofisi ya MISA-Tan haitapokea fomu yoyote baada ya tarehe hiyo. Nafasi za kugombewa ni pamoja na Mwenyekiti, Mjumbe mmoja mwenye taaluma ya sheria, Mwekahazina ambaye atakuwa na sifa za uhasibu na wajumbe sita wa NGC. Wajumbe hao sita watachaguliwa kulingana na kanda (kama Katiba ya MISA-Tan ilivyofanyiwa marekebisho mwaka 2007). Kanda hizo ni Zanzibar,Kanda ya Mashariki (DSM, Morogoro, Pwani, Mtwara na Lindi),Kanda ya nyanda za Juu Kusini (Iringa, Mbeya, Rukwa na Ruvuma), Kanda ya Ziwa (Shinyanga, Kagera, Mwanza, Mara na Kigoma) Kanda ya Kati (Dodoma, Singida na Tabora) na Kanda ya Kaskazini (Manyara, Arusha, Kilimanjaro na Tanga). Wagombea wote na wapiga kura wanatakiwa kuwa wanachama kwa kipindi kisichopungua miaka miwili.
Ukisoma tangazo hili mtaarifu na mwenzako
NB: FOMU ZIWASILISHWE OFISINI KWETU CLOCKTOWER SHOPPING CENTRE GHOROFA YA KWANZA CHUMBA NAMBA 2 , MTAA WA UHURU/NKRUMAH AMA KWA BARUA PEPE.
IMETOLEWA NA
ANDREW MARAWITI
KAIMU MKURUGENZI